ភ្នំពេញ៖ កាកបាទក្រហមកម្ពុជា បាននាំយកអំណោយមនុស្សធម៌ ដល់ប្រជាពលរដ្ឋរងគ្រោះចំនួន ២១គ្រួសារ ដោយសារអគ្គិភ័យក្នុងភូមិឫស្សី សង្កាត់ស្ទឹងមានជ័យទី២ ខណ្ឌមានជ័យ កាលពីថ្ងៃទី១៤ ខែមីនា ឆ្នាំ២០២៣។
ប្រធានកាកបាទក្រហម សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានចាត់ឱ្យមន្ត្រីនៃទីស្នាក់ការកណ្តាលកាកបាទក្រហមកម្ពុជា ចុះសួរសុខទុក្ខ និងនាំយកអំណោយមនុស្សធម៌ ដើម្បីជួយសម្រាលការលំបាកដល់ប្រជាពលរដ្ឋរងគ្រោះចំនួន ២១គ្រួសារ ក្នុងនោះមានផ្ទះ ៧ខ្នង និងមាន ៣១បន្ទប់ ដែលមានអ្នករងគ្រោះធ្ងន់ធ្ងរចំនួន ៥គ្រួសារ អ្នករងគ្រោះស្រាលមាន ២គ្រួសារ និងអ្នកស្នាក់នៅបន្ទប់ជួលមាន ១៤គ្រួសារ ដែលស្ថិតនៅក្នុងភូមិឫស្សី សង្កាត់ស្ទឹងមានជ័យទី២ ខណ្ឌមានជ័យ ។
ក្នុងឱកាសនោះ អគ្គលេខាធិការរងទី១ កាកបាទក្រហមកម្ពុជា លោកស្រី ម៉ែន នារីសោភ័គ បាននាំប្រសាសន៍សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ និងសម្តែងការសោកស្តាយចំពោះឧបទ្ទវហេតុភ្លើងឆេះផ្ទះនេះ ដែលបំផ្លាញទីជម្រកនិងទ្រព្យសម្បត្តិរបស់ពលរដ្ឋរងគ្រោះ។
លោកស្រីបានបន្តថា៖ «សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជានិច្ចកាលតែងតែគិតគូរពីសុខទុក្ខរបស់ប្រជាពលរដ្ឋរងគ្រោះនៅគ្រប់ទីកន្លែង ហើយតែងតែចាត់ឱ្យមន្ត្រីក្រោមឱវាទចុះភ្លាមៗឱ្យបានទាន់ពេលវេលា។ ថ្វីបើអំណោយទាំងនេះពុំអាចស្មើទៅនឹងទំហំ នៃការខូចខាតទ្រព្យសម្បត្តិ ដែលត្រូវភ្លើងឆេះក៏ពិតមែន ក៏ប៉ុន្តែបានចូលរួមរំលែកនូវទុក្ខលំបាកដែលបងប្អូនទាំង ២១គ្រួសារនេះ កំពុងជួបប្រទះបានមួយគ្រាផងដែរ»។
គួរឱ្យដឹងដែរថា កាលពីថ្ងៃទី១៤ ខែមីនា ឆ្នាំ២០២៣ មានអគ្គិភ័យមួយបានកើតឡើង ដោយសារឆ្លងចរន្តអគ្គិសនី បណ្តាលឱ្យឆាបឆេះផ្ទះយ៉ាងសន្ធោសន្ធៅ រាលដាលតៗគ្នាអស់ផ្ទះចំនួន ៧ខ្នងដែលមាន ៣១បន្ទប់ ស្ថិតនៅក្នុងភូមិឫស្សី សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ៕
